உள்நாட்டு செய்திகள்

கிழக்கு மாகாணத்தில் ஒரே நாளில் இதுவரை 27 பேருக்கு கொரோனா தொற்று – மக்களுக்கு விசேட அறிவிப்பு

(காரைதீவு நிருபர் சகா) கிழக்கு மாகாணத்தில் ஒரே நாளில் 27 பேர் கொரோனா தொற்றுக்குள்ளாகியுள்ளனர். பேலியகொடை சம்பவத்துடன் தொடர்புடைய மேலும் பலர் மறைந்துள்ளதுடன் பொதுமக்கள் இந்த விடயத்தில் உதவ வேண்டும். இல்லாவிடின் கிழக்கில் கொரோனா பரவுவதை தடுக்க முடியாது போகலாம் என, கிழக்கு மாகாண சுகாதாரப் பணிப்பாளர் வைத்திய கலாநிதி அழகையா லதாகரன் தெரித்தார்.


அவர் மேலும் சமகால நிலைமை தொடர்பில் ஊடகங்களுக்கு கருத்து தெரிவிக்கையில் கிழக்கு மாகாணத்தில், திருகோணமலை மாவட்டத்தில் 06 பேரும் மட்டக்களப்பு மாவட்டத்தில் 11 பேரும் கல்முனைப் பிராந்தியத்தில் 09பேரும் அம்பாறையில் ஒருவருமாக கொரோனாத் தொற்றுக்குள்ளாகியுள்ளமை ஒரே நாளில் அடையாளம் காணப்பட்டுள்ளது.

பேலியகொடை மீன்சந்தை சம்பவத்தையடுத்து எமக்கு கிடைத்த தகவலின் படி சந்தேகத்தின் பேரில் பலரை தேடிப்பிடித்து தனிமைப்படுத்தி PCR பரிசோதனை செய்த போது இந்த 27 பேர் தொற்றுக்குள்ளானது நிரூபிக்கப்பட்டுள்ளது. கல்முனைப் பிராந்தியத்தில் கல்முனைக்குடியில் 03 பேரும் நிந்தவூரில் 01 பெண்மணியும் பொத்துவிலில் 05 பேருமாக 09 பேர் இனங்காணப்பட்டுள்ளனர். மட்டக்களப்பில் வாழைச்சேனை கோறளைப்பற்றில் 11 பேரும் இனம் காணப்பட்டுள்ளனர்.

அம்பாறை நகரில் ஒருவர் இனங்காணப்பட்டுள்ளார். இவர் திவுலப்பிட்டியில் நடந்த திருமண வீடொன்றுக்குச் சென்று திரும்பி வந்தவர் என்று ஆரம்பக் கட்ட விசாரணைகளிலிருந்து தெரிய வருகிறது. நிந்தவூரில் இனங்காணப்பட்ட பெண்மணியின் தொற்று எங்கிருந்து வந்தது என்பது இன்னும் ஊர்ஜிதமாகவில்லை. இன்னும் பலர் சமூகத்துள் மறைந்து வாழ்ந்து வருகின்றனர். எனவே பொதுமக்கள் இது விடயத்தில் தகவல் தெரிந்தால் அருகிலுள்ள பொதுச் சுகாதார பரிசோதகர்களிடம் அறியத்தருமாறு கேட்டுக்கொள்கிறோம்.

அலட்சியமாகவிருந்தால் கிழக்கில் கொரோனாவைக் கட்டுப்படுத்த முடியாது போய்விடும். சுகாதாரத்துறை மட்டும் இவ் விடயத்தில் கவனமெடுத்தால் போதும் என்று எண்ண வேண்டாம். எனவே தயவுசெய்து சகலரும் ஒத்துழைக்ககுமாறு பணிவுடன் வேண்டுகின்றோம் என கிழக்கு மாகாண சுகாதார சேவைகள் பணிப்பாளர் குறிப்பிட்டார்.

Www.tamiltv.lk
  •  
  •  
  •  
  •  
  •  
  •  
  •  
  •  

பிரபலமான செய்திகள்

உலக தமிழர்களின் உண்மைக் குரல் www.tamiltv.lk

Copyright © Tamiltv.lk

To Top